Emmanuel Macron Frantziako presidentearen pentsio erreformaren aurkako beste protesta egun bat da gaurkoa Ipar Euskal Herrian, bosgarrena. Goizean goiz, ehunka herritar atera dira kalera sindikatuek deitutako mobilizazioetan parte hartzera. Horietako batean, Frantziako Poliziak LABeko kide bat atxilotu du. Trenbideetako langile bat da, eta atxilotu eta ordu pare batera utzi dute aske.
Goizean atxilotutako grebalaria askatu dute! @berriapic.twitter.com/JkBG9uRCnT
— Oihana (@oi_tsr) December 19, 2019
Atxiloketaren berri izan eta berehala, LABek komisariara joatera deitu du. Hamarnaka lagun joan dira, eta han geratu dira. Frantziako Polizia ere kanpoan bildu da. Delegazio bat Poliziarekin negoziatzera joan da. Prentsa txartela erakutsita ere, Poliziak ez dio pasatzen utzi nahi izan BERRIAko kazetariari. Komisarian atxilotua izan den bitartean, sindikatuko eta laneko kideak komisariako atarian egon dira, eta adierazi dute ez zirela handik mugituko sindikatukidea aske utzi arte.
Eñaut Aramendi @LAB_ieh "Baionako Komisaldegian gure laguna ez bakarrik uzteko etorri gara" @berriapic.twitter.com/SjNvMN6BSg
— Oihana (@oi_tsr) December 19, 2019
Erretreten erreformaren kontrako mobilizazioak goizean hasi dira. LABek Medef enpresarien elkarteko presidentearen enpresa blokeatu du. Baionako Cassin lizeoko ikasleek ikastetxea blokeatu dute. 11:00etan manifestazioa egin dute Baionan, eta, hain zuzen, ikasleak izan dira gaur buruan.
Azken egunetan, CFDT erakarri nahian, Macron prest agertu da erreforma aldatzeko. Erretiro adina atzeratuko lukeen orekarako adinean «hobekuntzak» egitea negoziatuko du Frantziako Gobernuak. Sindikatu batzuek protesta eguna egitera deitu dute gaurko ere.
