Europan sekula egin den teleskopio konplexuena da Gaia, Europako Espazio Agentziaren proiektu izarra. Espazioratu eta gero, bost urtean izarren informazioa jasotzen arituko da; 1.000 milioi izar aztertzeko gaitasuna izango du. Begien bistakoa da satelitearen konplexutasuna, eta eraiki duten Europako enpresen kopuruak ere neurria ematen dio proiektuari.
Hamasei herrialdetako berrogei enpresak parte hartu dute, tartean Sener, Nuter eta CTA, Euskal Herrikoa. Sener da zeregin garrantzitsuena duena, eguzki babeslea eraikitzeko kontratu nagusia lortu baitu. Teleskopioaren bigarren mailako ispiluen kokapenarekin lotutako mekanismoaren arduraduna izan da, halaber.
Senerren bidez sartu dira Gaiaren proiektuan Nuter eta CTA, zorroztasun handiko osagaien hornitzaileak bata eta bestea. Sener da, era berean, Hegan Euskal Aeronautika Klusterraren fundatzaileetako bat. Kluster horretan dauden enpresek 51 milioi euro fakturatu dituzte aurten espazioaren azpisektorean, eta %5 hazi da atal horretan.
