Ez dute jakinarazi zein erregai enpresa ikertzen ari diren gasolioa osagai kimiko eta gantzen bidez faltsutzeagatik, baina bai hamarnaka pertsona atxilotu dituztela, horietako asko erregaiaren sektoreko enpresariak. Atxilotu horiek ustez gasolineretako arduradunekin batera gasolioa beste substantziekin nahasten aritu dira aspaldian, erregai merkeena erregai garesti bezala saltzeko. Hilero 5 eta 12 milioi euroren arteko negozio ilegala martxan izan dutela dio Guardia Zibilak. Europa Press agentziak dio 2.000 milioi euroko iruzurra egon daitekeela gasolio faltsuaren atzean.
B eta C gasoeloak (litroa eurotik behera dago), berogailuetan eta nekazal makinerian baliatzen dena, A gasolio gisa (litroa 1,30 inguruan) salduz egin dute ustezko delitua, autoetara bideratuz. Gasolio manipulatu horrek autoen motorrean matxurak sortu dituela ere esan dute operazio polizialaren arduradunek. "Espainiako 30 probintzia" aipatzen dute albistea eman duten agentziek, eta "erkidego guztietan" kokatu dute operazioa, gasolinera zehatzen izenik eman gabe.
Duela bi urte hasitako ikerketa baten ondorioz jarri dute martxan gasolioaren ustezko iruzurraren aurkako operazioa. Mugetako Zaintza ohartu zen gertatzen ari zenaz, eta harritu egin zen, "ez erregaia faltsutzeko metodoarengatik, baina bai ekoizten ziren litro kopuru handiarekin".
