"Batasunaren balioa, erantzunak ahalik eta zabalen izateak duen balioa" defendatu du Mitxel Lakuntza Nafarroako ELAko buruak, eta nabarmendu du CCOOri eta UGTri egin dieten gonbitak bere horretan jarraitzen duela, "jende guztia kalera irten dadin arrazoiak" daudelako. Gehiengo sindikaleko ordezkariek greba erregistratu ondoren egin dute batasunerako deialdia.
Arrazoiak aipatzen hasita, osasunaren eta hezkuntzaren gainbehera agerikoak dira Lakuntzaren arabera, pentsioen beste murrizketa bat ere iragartzen ari dira, eta lan erreforma baten aukera ere aztertzen ari dira. "Murrizketa batek beste bat ekartzen du, eta egoera honetan gobernuek ezin dute soilik murrizketak eta ustelkeria proposatu". Greba egoera hori iraultzeko ahalegina egin behar dela uste du Lakuntzak, "sindikatu guztiek indarrak batuz".
LABeko bozeramaile Igor Arroyoren ustez, "amildegiaren ertzean" dago Nafarroa, gobernuaren urteetako jardun okerraren ondorioz, eta "larrialdi soziala" eragin du. Langabeziari erreparatu dio Arroyok, PPren lan erreformak kaltetutako langileei, "enpresarien mehatxuei eta jazarpenari". Zerbitzu publikoen gainbehera "harrigarria" ere aipatu du, hala nola, ospitale publikoetako sukalde zerbitzu "lotsagarriak". Aldaketa soziala bideratzeko "urrats bat aurrera" egin behar da haren ustez, eta hori programa "bateratu" baten bidez egin behar dela uste du.
