Iruzurraren kontrako borrokan "urrats esanguratsua" eman duela jakinarazi du Gipuzkoako Foru Ogasunak 2014. urtean, "lurraldean inoiz azaleratutako zerga zor kopururik handiena" atzeman baitu: 414,6 milioi euro, 2013an azaleratutakoa baino %5,3 gehiago.
Oro har, Sozietate Zergan antzemandako iruzur kopurua izan da gehien igo dena. Ogasunak 170,1 milioi euro azaleratu ditu, 2013an baino 302,5 milioi gehiago (%21,8 gehiago). Errenta eta Aberastasunean 112,2 milioi euro azaleratu dira, 2013an baino %7,5 gehiago. BEZ zergan, berriz, zerga zorrak behera egin du nabarmen (%-4,3).
Xabier Olano Ogasun zuzendariak Batzar Nagusietan eskaini ditu iruzurraren aurkako emaitzaren datuak. "Ikuskaritzarekin lortutako emaitzak bikainak izan dira 2014an", adierazi du. Izan ere, ikuskaritzaren bidez azaleratutako zerga zorra %50,2 handiagoa izan da. "Gehienbat, enpresak sustatzeko sozietateen erregimen bereziari egindako ikuskapenei esker eta Ogasunean iruzurraren aurka abiarazitako unitate berriari esker lortu dira emaitzak".
