Negoziazio kolektiboak geldirik jarraitzen du. Hala islatzen du KES Euskadiko Kontseilu Ekonomiko eta Sozialak plazaratutako azken txostenak. Erakundearen arabera, gaur-gaurkoz indarrean dauden lan hitzarmenen %12 baino ez zituzten berritu iaz Araban, Bizkaian eta Gipuzkoan, urtea itunen %57 luzatuta eta %20 iraungita hasi arren. Horren ondorioz, soldatak eta lan kostuak jaitsi egin direla ohartarazi du. Langabezia tasak ere beheranzko bideari eutsi dio, baina lanpostuen kalitatea ez da behar bestekoa izaten ari, KESen aburuz: "Iraupen luzeko langabeen egoera kronifikatzen ari da".
Arlo sozialari begiratu dio KESek, eta berebiziko kezka agertu du biztanleriaren zahartzeagatik: EAEk du Europako jaiotza tasa baxuenetakoa. Pobreziaren arriskuak, halaber, %15,3raino behera egin duela ondorioztatu du erakundeak, baina krisiak areagotu dituen gizarte desorekak oraindik ez direla gainditu. 2016ko joera ekonomikoa, ordea, ona dela nabarmendu du.
Ildo berean, Araba, Bizkai eta Gipuzkoako BPGa aurten %2,7 eta 2017an %2,3 haztea espero du Bilboko Merkataritza Ganberak, industriaren susperraldiak eraginda batik bat. KESen hitzetan, berriz, ekoizpenaren eta enpleguaren hazkundea bere horretan mantenduko dira 2016an, merkatuaren "argi-ilunak" bultzatuta.
