Hego Euskal Herriko beste lurraldeetan, ordea, zerotik gora dago inflazioa: %0,3 Araban, %0,4 Gipuzkoan eta %0,5 Bizkaian. Berez, martxoan prezioek gora egin zuten, hiru lurralde horietan ez ezik, baita Nafarroan ere. Batezbesteko igoera %0,3koa da, baina iazko martxoan igoera %1ekoa izan zenez, azken 12 hilabeteotako datuak behera egin du nabarmen.
Martxoan gehien garestitu diren produktuak jantziak eta oinetakoak -merkealdia amaitu da- eta etxeetarako tresneria dira. Elikagaiak %0,6 merkatu dira -arraina, fruta, olioa eta haragi batzuk batez ere- eta garraioak %0,4. Azken atal hori da azken urtebetean gehien merkatu dena, %7,8 hain zuzen ere, petrolioaren prezioaren amiltzeari esker. Petrolio upela batez beste 47 dolarrean salerosi zen joan den martxoan, eta 103 dolarrean duela urtebete.
Urtea hasi denetik jaitsiera nabarmenak izan dituzte prezioek Hego Euskal Herriko lurralde guztietan: -%1,4 Araban eta Nafarroan, -%0,9 Bizkaian eta -%0,8 Gipuzkoan.
Erosteko ahalmena
Espainiako Ekonomia Ministerioak irakurketa baikorra egin du inflazioaren datuei buruz. Batetik, azpimarratu du lehen aldiz urriaz geroztik prezioek gora egin dutela hilabete batetik bestera. Bestetik, gogorazi du euroaren eremuko inflazioarekiko aldea azken urteotako txikiena dela.
Euskadiko CCOOk, berriz, ziurtatu du prezioek beherantz jarraituko dutela datozen hilabeteotan -petrolioak iazko abuztuan jo zuen goia-, baina horregatik soldatak jaitsi behar ez dutela aldarrikatu du. «Garran- tzizkoa da EBZren inflazio aurreikuspenen inguruan igotzea (%2), familien erosketa eta kontsumo gaitasuna aktibatzeko eta ekonomia suspertzeko».
Antzeko deia egin du UGT-Euskaldik ere, eta ontzat hartu du soldatak KPItik gora igotzea, «azken urteotan soldaten errentak enpresen irabazien azpitik jaitsi direla konpentsatzeko».
