Ekonomia

Greba eta mobilizazio eguna izango da ostegunean Euskal Herrian. Hegoaldean, Eskubide Sozialen Gutunak egin du lana uzteko deialdia, lan, bizitza eta pentsio duinak eskatzeko.

Eskubide Sozialen Gutunaren esanetan, gaurko grebak erakutsi du «kaleak hartzeko prest dagoen gehiengo bat» badela. Tentsioa izan da piketeen eta Poliziaren artean, hainbat merkataritza gunetan. Hamalau lagun atxilotu dituzte.

Hezkuntza publikoko langileen %70ek egin dute bat grebarekin Araban, Steilasen arabera. Industrian, enpresa ertain eta handietan lanuzteak egon badira ere, grebaren erantzuna apalagoa izan da.

Enpresa garrantzitsu batzuk itxita egon dira, eta trafikoan eragin argia izan dute piketeen errepide mozketek, baina, oro har, gorabeheratsua izan da grebaren erantzuna. Bilbo bete duen mobilizazioarena izan da argazkirik indartsuena.

Greba deialdiak Gipuzkoan izan du arrakastarik handiena, baina alde handia egon da herri batzuetatik besteetara, eta sektoreen arabera. Lurraldeko industria alorreko enpresa nagusiek bat egin dute, eta merkataritza gune handietan ere eragina izan du. Bi pikete atxilotu dituzte Donostian

Kontraste handiko argazkia utzi du grebak Nafarroan: iparraldean erantzun handiago izan du, Iruñerrian orotariko erantzuna izan du, eta hegoaldean gutxiago nabaritu da. Bost lagun atxilotu dituzte goizean izandako istiluetan.

Industrialdeetan izan du grebak eraginik handiena. Piketeek, berriz, hainbat errepide eta merkataritza gune itxi dituzte Hego Euskal Herrian. Eguerdian manifestazio jendetsuak egin dituzte hiriburuetan; antolatzaileen arabera, 145.000 lagun elkartu dira eguerdiko manifestazioetan.

Gehienak, bederatzi, iluntzean atxilotu dituzte, Iruñeko Morea merkataritza gunean protestan ari zirela.

Irekitzen saiatu dira saltoki handi gehienak, baina bertan izan dituzte piketeak. Ertzain asko ibili den arren, lortu dute batzuk aldi baterako ixtea.