Bilboko Iberdrola dorrea inauguratu dute gaur eguerdian, eta, bien bitartean, hainbat alderdi eta sindikatuk protesta egin dute dorrearen kanpoaldean, Garoñako zentral nuklearra behin betiko ixteko eskatzeko. Horiekin batera, M-15 mugimenduko hainbat kidek Espainiako errege-erreginen bisitaren aurka egin dute protesta.
Errege-erreginekin batera bildu dira inaugurazio ekitaldian Patxi Lopez Eusko Jaurlaritzako lehendakaria eta Ignacio Sanchez Galan Iberdrolako presidentea, baita beste 400 bat gonbidatu ere.
Abandoibarra pasealekuan dago dorrea, eta Cesar Pelli arkitekto argentinarrak diseinatu du. 62.000 metro karratu ditu, 41 solairu eta 165ko metroko altuera. Goiko pisuan, heliportu bat dauka.
