Igorreko (Bizkaia) Negarra enpresak 59 langile kaleratzeko espedientea aurkeztu du; tximinia eta galdara elektrikoak egiten ditu enpresak, eta guztira 177 langile daude.
Langile batzordeak egungo egoera gainditzeko neurriak negoziatzea proposatu zion Negarrako zuzendaritzari, baina langilerik ez kaleratzeko eskatu zion.
Batzordea CCOO sindikatuko zortzi kidek eta LABeko batek osatzen dute. Bi sindikatuetatik salatu dute kaleratuak izan daitezkeenen artean 54 urteko langileak daudela, baita enpresan 35 urteko antzinatasuna dutenak ere.
Espedientea Espainiako lan erreformaren legediari jarraiki tramitatuko da, eta beraz, espedienteak ez du Eusko Jaurlaritzaren baimena jaso beharko.
Langileek biltzar orokorrera deitu dute biharko, neurri horren aurkako mobilizazioen inguruan adosteko.
