Inflazioak %3an jarraitzen du, jantziek eta gasolioak bultzaturik

Europako Banku Zentralak behin eta berriro iragarritako inflazioaren jaitsieraren arrasto handirik ez dago, Hego Euskal Herrian behintzat. Urrian, urte arteko inflazioa %3an geratu zen, bigarren hilabetez jarraian. Apirilean jo zuen goia, %3,7arekin, baina ez da uste bezainbeste jaitsi, krisiak Europako kontsumoa jaitsi arren, erregaien salneurriak ez direlako apaltzen. Urrian prezioak beste %0,9 igo ziren, INEren arabera, udako merkealdiaren ondoren jantzien eta oinetakoen salneurriak igo egin direlako. Berogailuetarako gasaren eta gasolioaren garestitzeak ere izan du zeregina, baita tabakoaren igoerak ere.