V. N. D. 52 urteko janari banatzailea hil zen bart, Getxon (Bizkaia), gidatzen zuen motorra zubi batetik behera erorita. Auto batek jo zuen banatzailearen motorra Euskal Herria kalean zegoela, eta haren azpian dagoen Garbigunera erori zen.
Ertzaintzak auto gidaria atxilotu du gaur, J. J. G. G., 20 urtekoa eta Portugaletekoa. Zuhurtziarik gabeko homizidioa egotzi dio. Autoaren gidariak ez zuen zauririk jasan, baina artatu behar izan zuen nerbio krisia izan zuelako.
23:00 aldera gertatu zen ezbeharra, Ertzaintzak eta Getxoko Udalak jakinarazi dutenez.
Osasun zerbitzuak bertara joan ziren, baina ezin izan zuten gizonezkoa bere onera itzuli. Auzitegi Medikuntzako Institutura eraman dute hilotza, autopsia egin diezaioten.
