"Niri ere gustatuko litzaidake errelebo kontratua dagoeneko martxan egotea, baina ez da posible izan", adierazi du Angel Toña Eusko Jaurlaritzako Enplegu sailburuak. Aitortu du CCOOk izan ditzakeela "arrazoi batzuk" Elkarrizketa Sozialerako Mahaitik altxatzeko, baina defendatu du gobernua ez dela berariaz ari atzeratzen hitzartutako neurrien aplikazioa.
"Ezagutzen gaituen inork ezin du esan berariaz ari garenik atzeratzen. Dekretua prest egongo da apirilerako, eta atzerako eragina izango du urte hasierara arte", azaldu du Toñak. Jaurlaritzak mahaian adostutako neurriak aurrera ateratzeko borondatea daukala berretsi du sailburuak.
Atzo, hain zuzen, CCOOk jakinarazi zuen Elkarrizketa Sozialerako Mahaia lagako duela gobernuak han hitzartutakoak bete arte. Sindikatuaren ustez "onargarriaren mugak" gainditu ditu Jaurlaritzaren jarerak. Eusko Jaurlaritzak, Confebask patronalak eta UGT eta CCOO sindikatuek osatzen zuten atzo arte; ELAk eta LABek mahaian parte hartzeari uko egin zioten hasieratik —2014ko urte amaieran sortu zuen Jaurlaritzak—, argazki huts bat ateratzeko mahaia zela argudiatuta.
