Kontzertu ekonomikoari buruzko batzorde mistoa bihar batzartuko da, kontzertuaren erreforma berretsi eta bost zergaren transferentzia onartzeko. Helena Franco Gipuzkoako Ogasun diputatuak jakinarazi du batzordearen bileran izango dela eta onartu egingo dituela bost zergen erreformak.
Francok gogor kritikatu du Jaurlaritza, haren "itxikeriagatik", baina ez du betoa erabiliko biharko bileran, "erantzukizunagatik". Haren ustez, "bigarren mailakoak" dira biharko bilerako gaiak. Kupo legea eta BEZaren eskualdatzea dira gai garrantzitsuenak Francorentzat.
Trukean, subiranotasun fiskalari buruzko batzorde egonkor eta iraunkor bat sortzeko eskatuko dio Gipuzkoak Jaurlaritzari bihar.
