Kamioilari bat zendu da gaur bazkalondoan Elduainen, Gipuzkoan, istripu batean. Herrizaingo Sailak jakinarazi duenez, 14:00 aldera gertatu da ezbeharra, Elduain eta Berastegi artean, GI-2130 errepidean. Berastegiko norabidean zihoala, malda batean behera joan da ibilgailua. Gidaria istripuaren unean bertan hil da.
Kamioia ateratzeko lanean ari dira orain garabiak. Ez dute datu gehiago eman oraindik. Bobinak zeramatzan kamioiak.
Bi zauritu Elgoibarren
Era berean, beste istripu bat izan da arratsaldeko 16:45ak aldera, Elgoibarreko N-634 errepidean. San Antolingo biribilgunetik gertu, bi autok elkar jo dute, eta 66 eta 42 urteko bi emakume gidariak zauritu dira. Mendaroko ospitalera eraman dituzte. Errepidea zabalik dago.
