Kontsumobide kontsumoko euskal institutuak Araba, Bizkai eta Gipuzkoan inportatutako 256.000 produktu ikuskatu zituen iaz, eta horietatik 20.000 baino gehiago kendu zituen merkatutik, arriskutsuak zirelako edo fabrikazioan gabeziak zituztelako.
Kontrolatutako produktuen %77 ehungintzako produktuak, zapatak eta osagarriak izan ziren, %11 jostailu eta jokoak, beste %11 altzariak eta %1 material elektrikoa. Dena den, merkatutik kendutako gehienak jostailuak izan ziren, 20.173, hain zuzen.
Kontsumobidek gaur zabaldutako prentsa ohar batean azaldu du inportatutako produktuen gaineko kontrola indartu zuela iaz. Institutuaren ikuskatzeen helburua da erabiltzaileei eskaintzen zaizkien produktuek baldintza guztiak bete ditzaten ikustea, eta arriskua eragin ditzaketenak baztertzea.
