Ataute SL Kukuxumusu markaren jabea da, eta Kukuxumusu SL, marka merkaturatzen duena. Bi horiek bideragarritasun plan bat aurkeztu dute, bi enpresen etorkizuna bermatzeko asmoarekin. Negozio bide berriak eta nazioartekotzea ere izango dira haien apustuak.
Kukuxumusuk jakinarazi duenez, "behartuta" ikusi dute euren burua, hartzekodunen konkurtsoa saihesteko. Kukuxumusu SLren kasuan aste honetan 23 langileri eragingo dien erregulazioa aurkeztuko dute; Atauten, berriz, datozen egunetan emango dute neurri zehatzen berri.
Azken bi urteetan bi enpresetan lanpostuak ez galtzeko neurriak hartu dituzte. "2008tik egoerari eusten saiatu gara, gehienbat, lanpostuak ez suntsitzeko, baina 2011ko ilusioaren ondoren, ikusi dugu 2012an kontsumoa gelditu egin dela".
