Martin Garitano Gipuzkoako ahaldun nagusiak atzo agertu zuenaren ildotik, PSE-EEk Kutxabanken administrazio kontseiluaren osaketa atzeratzeko eskatu du gaur, Kutxen Legeak aukeraketa hori egiteko beste prozesu bat ezar dezakeela aurreikusita.
Arbitratze Batzordeak atzera bota zuen atzo Bizkaiko Aldundiak Kutxen Legeari jarritako helegitea. Bilduk ere salatu egin du EAJk eta PPk Kutxabankeko administrazio batzordeko karguak banatzeko egindako akordioa, eta Markel Olano eta Joseba Egibar EAJkoei eskatu die horren gainean euren jarrera agertzeko.
LAB sindikatuak gaur jakinarazi duenez, Kutxabank salatuko du "negoziazio mahaia osatu nahi ez izateagatik". Salaketa Hegoaldeko lau herrialdeetako lan ordezkaritzetan jarri du, Kutxabankek ez duela langileen hitzarmena bete argudiatuz.
"Onartezina da banku berria langileen baldintzen arloan legez kanpo jokatuz abiatzea", esan du ohar batean. LABek kontsulta bat egin nahi du langileen artean eurek erabaki dezaten zer esparru izan nahi duten.
