Kutxaren markak kolore gehiago eta lelo berria ditu

DONOSTIA. Aldatu egin du marka Kutxak, eta gaur plazaratu du berria. Koloretsuagoa da, eta beste lelo bat darabil: Zugandik zugana. «Kutxa zugandik sortzen da; zure eguneroko bizitzaren parte da, eta zugana doa zuzenduta; haren emaitzak zu bizi zaren gizartera doaz», azaldu dute finantza erakundeko ordezkariek. Koloreei dagokienez, berdea, zuria eta urdina konbinatu dituzte. Alabaina, beltza izango da kolore korporatibo eta instituzionala. Marka aldatu arren, Txilidaren jatorrizko anagrama eta logotipoa mantendu dituzte.