Langileen lan baldintzak era nabarmenean okertu dituen Espainiako Gobernuaren lan erreformak herrialde horretako Auzitegi Konstituzionalaren bedeinkapena dauka. Madrilgo Gizarte arloko epaitegi batek Espainiako Konstituzioaren aurkakotasuna helerazi zion goi epaitegiari, eta auziari erantzuna eman dio orain: 2012ko otsailean gobernuak onartu zuen lan erreforma legezkoa da, hala forman (dekretu bidez onartu izana) nola edukian.
Auzitegi Konstituzionaleko zazpi epaile erreformaren legezkotasunaren alde azaldu dira, eta lau aurka. Kaleratzeengatik erreformak finkatu dituen kalte ordainak zeuden ezbaian, baina auzitegiak esan du legezkoak direla. Lehen aldia da Espainiako Auzitegi Konstituzionalak lan erreformari buruzko ebazpena ematen duela. Madrilgo epaitegi berak hamasei aldiz helarazi dio konstituzioaren aurkakotasuna, baina horietan guztietan ez du auzia tramitera onartu Konstituzionalak.
