LABek lan harremanetarako eredu berri bat eraikitzen hasi nahi du. Gainontzeko sindikatuei, patronalari eta instituzioei “enpresa eredu berri batera egokitutako lan harremanetarako eredu bat” lantzen hastea proposatu die. Ainhoa Etxaide idazkari nagusiaren hitzetan, “prezioak jaistean eta prekarietatean oinarritutako ereduak ez du funtzionatu; aldaketa behar dugu, euskal gizartearen garapenean eta enpleguan inbertituko duen eredu bat behar dugu”.
Krisiaren ondorioak eta batez ere langabeziaren arazoa gainditzeko, lanaren eta aberastasunaren banaketan oinarritutako eredua defendatu du. Horretarako, baina, funtsezkotzat jo du estatuko eta enpresako itunak lehenesten dituen negozioazio kolektiboaren erreforma geldiaraztea, “hemengo errealitatea beste bat delako, eta errealitate horretara egokitutako eredua behar delako”.
