LANGABEZIA. Martxoan 4.000 langabe gutxiago izan ziren Hegoaldean

Hego Euskal Herriko langabe kopuruak %4,27 egin zuen behera joan den hilabetean. Guztira, 92.743 langile zeuden martxoan lana aurkitu ezinik, hau da, otsailean baino 4.140 gutxiago. Azken urtean izandako beherakadarik nabarmenena da. Lau herrialdeetan gutxitu zen kopurua: %6,16 Nafarroan, %4,99 Gipuzkoan, %3,23 Bizkaian eta % 4 Araban. Hego Euskal Herriko langabeen %58,9, bestalde, emakumeak ziren.

Langabezia tasak, berriz, %7,67tik %7,34ra egin zuen behera, INEMen datuen arabera. Bizkaiak izan zuen tasarik handiena, %8,58koa, hain zuzen. Ondoren datoz Nafarroa (%6,70), Gipuzkoa (%6,42) eta Araba (%6,28). 232.309 langile kontratatu zituzten Hego Euskal Herriko enpresek martxoan. Horietatik 21.041 baino ez ziren izan mugagabekoak, hots, %9,1. Otsailean %8.9koa izan zen portzentaje hori. Herrialdekako datuak kontuan hartuta, Nafarroak dauka portzentajerik handiena (%11,69).