Lanbide Eusko Jaurlaritzaren Euskal Enplegu Zerbitzuak lau mila langabe kontratatzeko plan berezia martxan jarriko du, gaur Gemma Zabaleta Lan sailburuak Gasteizen jakinarazi duenez —Lanbideko administrazio kontseiluaren izenean mintzatu da—. Gazteei, langabezia saria jasotzen ez duten langabeei eta diru sarrerak bermatzeko errenta kobratzen duten onuradunei zuzenduko zaie egitasmoa.
Kontratuak aldi baterako izango dira, eta, asko jota sei hilabeteko iraupena izango dute. Hori bai, lanaldi osoak izango dira eta soldata sektoreko itun kolektiboaren araberakoa izango da. Lanbidek berak kudeatuko ditu eskaerak, eta kontratazioa sustatzeko 42 milioi euro bideratuko ditu. Batez beste, kontratu bakoitzak 1.500 euroko laguntza publikoa jasoko du.
Ekonomia suspertzeko asmoz Jaurlaritzak egindako +euskadi09 planaren jarraipena izango da. Plan horrek zazpi mila langabe aldi baterako kontratatzea aurreikusten zuen, baina azkenean 5.600 izan ziren. Azken kontratuak joan den urtarrilaren 31n amaitu ziren, eta 61,5 milioi euroko laguntza publikoa jaso zuten guztira.
