Gaurkoa da ELA eta LAB sindikatuek deitutako lehen greba eguna Lanbiden, urteotako "bilakaera okerra" gaitzesteko. Guztira bost egunetan egingo dituzte lanuzteak: gaur eta bihar, eta urriaren 3, 4 eta 5ean. Gaurkoan, gainera, kontzentrazio zaratatsua egin dute 11:00etan Lanbideko Zerbitzu Zentralean, Gasteizen.
Enplegu zerbitzuaren antolakuntza gabeziak —190 orientatzaile kaleratu eta ordezkatu dituztela salatu dute—, langileen kopuru urria eta ezegonkortasuna salatu dituzte sindikatuek. LABen esanetan, gainera, langile gutxi egoteaz gain, orientazioko funtzionarioekin bat ez datozen betebehar gehiago egiten dituzte, eta orientatzaileek haien lanpostua galtzeko arriskua daukate. "Gatazka honek 195 langileren egonkortasunean dauka eragina modu zuzenean, bulegoetako %30".
Administrazioak ez dauka akordio bat egiteko borondaterik, sindikatuen arabera, eta horregatik ikusi dute "mobilizazio sendoak egin beharra". Joan den astean iragarri zuten bost eguneko greba bi sindikatu abertzaleek: "Badakien arren zein den egoera eta behin baino gehiagotan galdegin diogun arren zerbitzuaren kalitatea bermatu eta Lanbideri egonkortasuna eman diezaiola, ez dugu erantzunik jaso horri buruzko bileretan. Langileei aukera bakarra utzi die: mobilizaziora jotzea".
