Patxi Lopez Eusko Jaurlaritzako lehendakariak kritikatu egin du Espainiako Gobernuak Bankiari 23.000 milioi euro emateko modua. "Banku baten zulo bat estaltzeko diru publikoa sartu behar bada, horrek baldintza batzuk izan behar ditugu: lehena, bankuko arduradunek milioi askoko kalte-ordainak ez jasotzea, eta bigarrena, bankuak diru hori itzultzea, dirua mugimenduan izateko eta familiei eta enpresei prestatzeko".
Baldintza horiek bete ezean, lehendakariak azaldu du bera ez litzatekeela bankuei dirua uztearen aldekoa.
Jose Ignacio Goirigolzarri Bankiako presidenteak azken egunetan iragarri du gobernuari ez diotela sosik itzuliko.
Lopezen arabera, Bankia auzian "baten batek gobernuak, herritarrak eta bezeroak engainatu" egin ditu. "Ez da posible aste batean etekinak aurkeztea eta hurrengoan 23.000 milioi euroko zuloa egotea".
