Maiatzaren 31n greba egitera deitu dituzte ELA, LAB, EILAS eta ESK sindikatuek Araba, Bizkai, Gipuzkoa eta Nafarroako langile publiko guztiak. Hego Euskal Herrian diharduten administrazioek azken hiru urteotan egindako edo iragarritako murrizketak salatuko dituzte, sindikatuon ustez, zerbitzu publikoak eta ongizate estatua "desegiteko" helburua dutelako.
Lau sindikatuetako ordezkariek goizean Bilbon eginiko agerraldian azaldu dutenez, bi aldarrikapen uztartuko ditu lanuzteak: batetik, zerbitzu publiko unibertsalak, kalitatezkoak eta doakoak defendatuko dituzte, eta, bestetik, zerbitzu publikootako langileen eskubideen alde egingo dute.
Hegoaldean 130.000 eta 140.000 lagun artean ari dira erakunde publikoetan lanean.
