Iazko urtarrilarekin alderatuta, euriborra 0,096 puntu igo da. Horrek esan nahi du 120.000 euroko mailegua 20 urtean itzuli behar dutenek hilabetean 5,54 euro gehiago ordaindu beharko dituztela. Euriborra da hipoteka maileguetan gehien erabiltzen den indizea, urtean behin igo ohi da, eta Europako Banku Zentralak finkatzen duen interes tasa ofizialarekin nolabaiteko lotura du. Joan den martxoan beheko maila jo zuen, %2,055era iritsi zenean. Orduz gero gora egin du apur bat, EBZk interes tasak igoko zituela espero baitzen orduan. Ez da halakorik gertatu, euroguneko ekonomia ez baita adituek espero zuten bezain beste igo. Hazkundea bizkortu arte Alemanian batez ere, EBZk bere horretan utziko du diruaren prezioa. Finantza adituek aurreikusi dute 2005. urtearen erdialdera arte gutxienez EBZk ez dituela interes tasak igoko, eta asko dira urte amaiera arte egingo ez duela iragarri dutenak. Gainera, igotzekotan, puntu laurden igoko da, %2,25era alegia. Petrolioak garesti jarraitzen badu, interes tasak %2an geratzeko aukerak handiagoak dira, erregaiaren prezioak asko moteltzen baitu ekonomia.Horiek hala, litekeena da Euriborrek ere gorabeherekin jarraitzea hurrengo hilabeteotan. Hori bai, urtearen lehen erdian behintzat, iaz baino 0,1-0,2 puntu gorago izango denez, etxebizitza mailegua itzuli behar dutenek pixka bat gehiago ordaindu beharko dute hilean.
-
Euriborra
Urtarrila (2005) 2,312
Abendua (2004) 2,301
Azaroa 2,328
Urria 2,316
Iraila 2,377
Abuztua 2,302
Uztaila 2,361
Ekaina 2,404
Maiatza 2,297
Apirila 2,163
Martxoa 2,055
Otsaila 2,163
Urtarrila 2,216
