ELA, LAB, ESK, CNT, CGT, EILAS, Hiru eta EHNE sindikatuetako ordezkariek eta hainbat eragile sozialetakoek esan dute aurreko greba orokorrean baino "arrazoi gehiago" dagoela irailaren 26koan lanuztea egiteko. Gaur erregistratu dute eskaera, Eusko Jaurlaritzaren Bilboko egoitzan. Nafarroako Gobernuan aurki egingo dute eskaera, deialdia Hego Euskal Herrikoa baita.
Endika Labort CNTko ordezkariaren esanetan, “oinarrizko eskubideen aurka egiten ari dira, murrizketen aldetik, eta gizarte eskubideei eraginez”. Hori dela eta, eskubideen defentsan kalera irteteko deia egin du Labortek.
Javier Serra Posada de los Abrazos elkarteko bozeramaileak esan duenez, berriz, langabeziaren gorakada “Espainiako Gobernua hartzen ari den murrizketen politiken ondorioa da”.
Gobernuak onartutako azkeneko neurri sortaren kontra deitu dute grebara. Uztailaren 19an jakinarazi zuten horren berri.
Aurreko greba orokorra aurtengo martxoaren 29an antolatu zuten, Espainiako lan erreformaren aurka. Oso oihartzun handia izan zuen. CCOOk eta UGTk Espainiako Estaturako deitu zuten egun bererako.
