Hainbat hedabidek gaur argitara eman dutenez, MCCk hainbat murrizketa egiteko eskatu die taldeko 260 kooperatibetako zuzendaritzei, besteak beste, lanpostu murrizketa "zorrotzak" egiteko, lan ordu kopurua handitzeko eta soldatetan gainsariak kentzeko.
Taldearen barne ohar bat iturri hartuta, hedabide horiek diote MCCk egitura krisia iragartzen duela, eta hainbat urte iraungo dituela.
Ohar horretan MCCk produktibitatearen jaitsiera aurreikusten du eta horrek taldearen emaitzetan eragin ez dezan eskatu diete neurriak hartzeko. Aipatutakoez gain, zailtasunak dituzten enpresak eta etekinik ez dutenak ixtea eta aktiboak saltzea aztertzeko eskatu dute.
MCCko kooperatiba guztiek 100.000 langileko lan taldea dute. Oharraren edukiaren berri azaroan eman omen zien Jose Maria Aldekoa MCCko presidenteak zuzendaritzei.
