Grebak Araban izan duen jarraipena desberdina izan da leku batetik bestera. Sindikatuek Mercedeseko eta Michelineko lan uzteak nabarmendu dituzte goizean goiz, eta adierazi dute langileen %46k egin dutela bat deialdiarekin. Gasteiztik kanpo, Laudio aldean parte hartze zabala izan du grebak.
SEA Arabako patronalak, ordea, jarraipen eskasa izan duela adierazi du, eta enpresak normaltasunez ari direla lanean nabarmendu du. Enpresarien arabera, langileek %9,14k egin dute bat greba deialdiarekin.
Gasteizko Vital Kutxaren bulegoetako batean atarian sua piztu dute, eta itxi egin behar izan dute. Ertzaintza Aldundiaren egoitza zaintzen aritu da goiz osoan. Gasteizen hiru lagun atzeman ditu Poliziak, eta beste hamabi inputatu egin dituzte. Barrikada bat itzali behar izan dute Gasteizko suhiltzaileek 07:00ak aldera.
