Sindikalismoaz eta egoera ekonomikoaz luze jardun du BERRIAk Adolfo Muñoz Txiki ELAko idazkari nagusiarekin (Mañueta, Araba, 1959). LABekin lankidetzan aritu da berak zuzendutako sindikatua, baina hautsi egin zen batasun sindikala. Gertatutakoa azaldu du Muñozek: "2009an elkarlanean hasi ginenean, harremanak onak ziren, eta krisiak bultzatu gintuen lan bateratua egitera. Lan bikaina egin dugula uste dut, baina noiz agertu zen arazoa? Bildu erakundeetara iritsi zenean".
Negoziazio kolektiboaren erreformaren aurka agertu da Muñoz: "Erreformak sindikatuak baztertu nahi ditu, eta legeak egingo dituzte horretarako". "zinismoz" jokatzea egotzi dio Confebaski, eta nabarmendu du "kontraboterea duen sindikalismoak mugitu" egin beharra duela: "Fruta zuhaitzetik eroriko bada, mugitu beharra dago".
