“Atzo Adegik garbi utzi zuen. Beste erremediorik ez dagoenean negoziatu behar direla hitzarmenak”. Adolfo Muñoz ELAko idazkari nagusiak, horregatik, erreferentzia egin die LAB, CCOO eta UGT sindikatuei sektoreko hitzarmenen esparruan hartu duten jarreraren aurrean. “Patronalarekin topo egin nahi izan dute, baina Confebaskek ez du negoziatu nahi”. Horregatik, sindikatu bati gerta dakiokeen okerrena exisititzen ez den patronal bat bilatzea dela ohartarazi die.
Egoera horren aurrean, ELAk euren estrategia zein den gogorarazi du: enpresaz enpresako hitzarmenak bilatzea. “Egoerak interpelazio bat egin die sindikatuei, antolatu eta lan esparruetan borrokatzeko”. Horretaz jakitun, ELAk antolakuntzan aldaketak egingo dituela aurreratu du Eustakio Uranga arlo horretako arduradunak. Hala, lau federazio izan beharrean hiru izango ditu sindikatuak. Industria eta Eraikuntza federazio berria sortuko dute horrela, egungo metala eta hainbat federaziotako eraikuntza eta sektore industrialak bere barnean hartuz.
“Azken erreformei era eraginkorrean erantzuteko borondatean oinarritzen da aldaketa hau. Orain arte ezagutu ditugun joko arauak hautsi dira, eta goitik behera aldatu”. Hori dela eta, enpresaz enpresako borrokek indar handiagoa izango dutelako, bertatik gertuago egoteko helburu nagusia izango du federazioetako antolakuntza berriak.
