Xuban Nafarrate 19 urteko gaztea Gasteizko Santiago ospitaleko Zainketa Intentsiboetako Unitatetik gela arrunt batera pasatu dute gaur, onera egin ondoren, erietxeko iturriek esan dutenez. Grebaren aldeko mobilizazioetan parte hartzen ari zela ertzainekin liskarra izanda zauritu zen. Buruko traumatismoa du.
Gaur Ertzaintza oldartu egin zaie gaztearen aldeko kontzentrazioan bildutakoei, Gasteizen.
Nafarreteri gertatutakoaren bertsioak kontrajarriak dira. Senideen arabera, lurrera erori zen, lurrean zegoela borrekin jo zuten ertzainek, grebaren aldeko eskuorriak sartu zizkioten ahoan eta altxatzera zihoala pilotakada bat eman zioten. Herrizaingo Sailaren esanetan, aldiz, gaztea ertzainengandik ihesi zihoala lurrera erori eta zauritu zen.
Bilbon, bi ertzain zauritu ziren. Bat ospitalean dago, buruan duen zauriagatik.
