Organo iraunkorra falta

Wall Streeten eta gure indizeen artean ez dago elkarlanerako organo iraunkorrik. Baina hark gugan bederen nabarmen eragiten du. Independentzia eguna zela medio, jai izan zuten atzo AEBetan; eta horrek nabarmen eragin zuen, ohi denez, gurean, batez ere salerosketan: 1.198 milioirena izan zen atzo. Egun arrunten erdia edo. Prezioen eta, batez ere, igoeren zilegitasuna kolokan lagatzen du horrek. Santander eta Repsol-YPFk eragin zuten atzoko igoera; %2na igo ziren. Espainiako petrolio enpresa Argentinako YPF fililala saltzekotan dabilela zabaldu da eta, bistan denez, Txinak du abiadura handiko inbertsioak egiteko gaitasunik handien. Bankinter eta Renovablesek %2na pasa galdu zuten. Baina horien pisua eta igo zirenena ez dira noski parekagarriak. Aurtengo bigarren hiruhilekoa ez da lehena bezain latza izan Espainian, BPGren uzkurtzeari dagokionez; baina enpresen mozkinek baieztatu beharko dute joera hori, Ibex-35ek (+%0,67) eutsiko badio.



Liftingmoduko bat egin du Corporacion Dermoesteticak(-%0,95) autokarteran zituen akzioak amortizatuz. Aurretik azokan erositako 54 mila akzio deuseztatu ditu eta, horrenbestez, pastela banatzean, esku gutxiago ase beharko ditu.



Popular bankuak (+%0,99) Dermoesteticaren kontrako bidetik jo du. Uztailaren 6an bankuak dituen 50 akzioko autokarterako akzio bana banatuko die bankuak akziodunei. Hortaz, pastela banatzerakoan, esku gehiago. Akzioko ordaina ikusi behar.