Euskal ongizatearen inguruan hausnarketa kolektibo eta estrategikoa eskatu du Orkestra Lehiakortasunerako Euskal Institutuak. Finantza krisiaren ondoren hainbat erronkari heldu behar zaiela ebatzi du Deustuko Unibertsitatearen barneko institutu horrek, egungo ereduari eutsi ahal izateko zailtasunak izango direlako etorkizunean, Maria Jose Aranguren zuzendariak azaldu duenez. Landu beharreko hiru erronka nabarmendu ditu: enpresen lehiakortasunari eutsi ahal izatea, belaunaldi zahar eta gazteen arteko lankidetza sustatzea lan esparruan, eta hezkuntza eta lan esparruko agenteen arteko elkarlan handiagoa bultzatzea. Horretaz aparte, behar sozialei aurre egiteko gaitasunak lortzeko berrikuntza mekanismoak martxan jartzeko eskatu du Arangurenek, eta horretarako garapen ekonomiko eta sozialeko politiken artean harreman estua egon beharko da.
Baina euskal gizartearen zahartzeak ere eragina izango du ongizate sistema horretan, eta horregatik arlo horretan ere neurriak hartu behar direla azaldu du Arangurenek. “Erretiroa hartzeko adina luzatzeak ez du bermatuko datozen urteetan beharko den adina jarduera sortuko denik”. Horregatik, atzerritarrak erakartzea beharrezkoa izango dela uste du, “batez ere pertsona kualifikatuak”, behin iritsi ondoren bertan kualifikatzen jarraitzeko.
