Sei urteko penitentzia

Sei urte Egunkaria erahil zutela. 6.000 punturen bueltan zebilen Ibex-35 eta, Egunkaria auzian lez, itxuraz ez dugu ezer askorik aurreratu: 7.900 puntuko langaren azpitik gabiltza. Atzera lehengora bueltatu gaitezkeela dirudi, gainera. Erreserba Federalak hiru banku txiki bereganatu behar izan ditu eta, zurrumurruek diotenez, baliteke BBVAk (-%0,48) Popular (-%1,94) bereganatzea. Banku ez hain gaixoen penitentzia izan liteke, gaixoagoak irenstea. Ikuskizun dago horrek ez ote dituen guztiak gaixotuko. Atzo 1.741 milioiren salerosketa izan zen, eta Iberdrola eta Renovables izan ziren, %4na pasako igoerekin, eguneko izarrak. Banestok (-%3,8) Popularren antzeko gaitza izan dezakeela bistakoa da, eta, zer esan, gure Guipuzcoanoz (-%1,33). Banku guztiak zaku berean sartzen dituen epaile bat agertu bitartean jarraituko du jai giro horrek. Ea Telefonicak (-%0,64) bederen, eusten dion eta Santanderrek (-%0,38) ere ez duen muturra lar okertzen.



CNMVk iritzia plazaratu du: Banif Inmobiliario etxe agentzien funtsak dirua itzuli ahal izateko erabaki onena hartu du, alegia,bi urtez dirua ez itzultzea. Funts horrek 23 milioi euroan saldu berri du, aitortutako balioa baino %17 merkeago, Madrilgo Castellana etorbidean zuen bulego eraikinetako bat. 1999an ordaindu zuena baino %16 garestiago saldu du, hala eta guztiz ere. Madrilen ditu funts horrek aktibo gehienak eta azken aldian eraiki diren bulego dorreekin, salmenta azkarretarako garairik onena ez da, noski.