Sestaoko (Bizkaia) Arcelorreko langileen batzarrak lantegia berriz martxan jartzearen alde bozkatu du gaur goizean egindako biltzarrean. Horren ondotik, CCOO sindikatuak jakinarazi du ekain hasieran zabal dezaketela berriro.
Lantegia geldirik dago, eta 450 langileri eragiten dien lan erregulazio espedientea dute pasa den urritik.
Erabaki horrekin batera, sarien sistema berri bat eta oporren egutegi berri bat negoziatzea onartu dute gaur, gehiengoaren botoekin.
Pasa den astean, LAB sindikatuak azaldu zuen langileen batzarrak atzera bota zuela CCOOk, UGTk eta ELAk lantegia berriz martxan jartzeko zuzendaritzarekin egindako akordiorako oinarria. Zuzendaritzak esan zuen proposamena onartu arte ez zela lantegia martxan jarriko.
