Joan den asteazkenean kaleratu zuen BERRIAk Confebaskek eragin mugatuko ituna orokortzeko asmoa duela azaleratzen duen agiria. Hurrengo egunean, ELAk eta LABek Confebasken dokumentuarekin bat datorren Jaurlaritzaren dokumentu bat aurkeztu zuten. Prentsaren aurrean egindako agerraldian Angel Toña Jaurlaritzako Enplegu sailburuaren dimisioa eskatu zuten Ainhoa Etxaidek eta Adolfo Muñozek, "agiriak jasotzen duen eduki antidemokratikoaren larritasunak" behartzen zituelako horretara.
Sindikatuek agerraldia amaitu eta gutxira aitortu zuen Jaurlaritzak lantzen ari diren zirriborro bat dela ELAk eta LABek erakutsitako agiria. Enplegu Sailak Elkarrizketa Sozialerako Mahaian parte hartzera gonbidatu zituen ELA eta LAB, gune horretan, "eguneroko lana eta dokumentuen edukia osorik jakinda", ekarpenak eta proposamen berriak egin ditzaten.
Agerraldiaren hurrengo egunean testu bat zabaldu zuen Iñigo Urkullu lehendakariak, Toña "egin beharrekoa" egiten ari dela, eta Eusko Jaurlaritzaren Enplegu sailburuek "mahai baten inguruan biltzeko prest dauden eragile sozialekin" lan egiten dutela esanez. Enplegu sailburuaren zeregina "proposamenak aurkeztea" dela ere esan zuen Urkulluk, eragile ekonomiko eta sozialek "baloratu, zuzendu edo aldatu" ditzaten.
