Txinako ekonomia %9,7 hazi da, baina inflazioa kontroletik at du

Txinak ez du Greziaren eta Irlandaren arazorik. Ezta Alemaniaren eta Ameriketako Estatu Batuenik ere. Txinako ekonomia iaz baino %9,7 gehiago hazi da aurtengo lehen hiruhilekoan. Herrialdearen barne produktu gordina (BPG) %2,1 handitu da hiruhileko batetik bestera. Munduko bigarren ekonomia da.

Baina inflazioa %5,4koa izan da martxoan Txinan, hiru urteko inflazio altuena. Gobernuak, ordea, %4tik behera nahi du urte amaierarako. Neurriak hartzen ari da: urritik lau aldiz igo ditu interes tasak eta sei aldiz bankuek gordailuak babesteko izan behar dituzten erreserbak, %20raino, utz dezaketen dirua mugatzeko.

Eta prezioak gehiegi garestitzen badira, herritar pobreenentzat egoera eutsiezinagoa izango da, eta kalera joko dute, egoera salatzera. Txina aberatsa da, baina 150 milioi pobre inguru ditu.