Bi lantoki ditu Urechek Gipuzkoan, Colmure Oiartzunen eta Marmoles Ureche Errenterian. 38 lagun aritzen dira aurrenekoan eta 29 bigarrengoan. Guztiak geratuko dira lanik gabe. Era berean, Sorian (Espainia) duen lantokia ere itxi egingo du, eta 50 langileri eragingo die neurriak.
Langileen arabera, irabazi handiak eduki ditu Urechek azken urteotan. Batetik, eraikuntza sektoreak lan asko izan duelako, eta, bestetik, bi harrobi, lantoki bat eta haren lurrak saldu dituelako. Oiartzunen daude lur horiek, eta 620 etxebizitza egin nahi dituzte han. Sindikatuen arabera, horrek erakusten du eraikuntzaren bidez dirua egin nahi izan duela enpresak. «Lur industrialei kalifikazioa aldatu eta haiek urbanizatzea baimendu dute.Hori ez da egun batetik bestera egiten, gustatu edo ez, diru jana egon da hor», azaldu zuen Jose Luis Martin UGTren Gipuzkoako eraikuntzako arduradunak.
Urritik soldatarik gabe
Enpresak konkurtso legea aurkeztu izanak harritu egin dituela gaineratu zuten langileek. «Uztailera arte, kategoria igoerak negoziatzen jardun gara, normal. Enpresak ez digu jakinarazi arazo ekonomikoak zituenik», adierazi zuen Manu Tena ELAko eraikuntza arduradunak.
Engainatuta sentitzen dira. «Eredu izango ginela esaten ziguten, marmol enpresa gehienak itxi egingo zirela eta gu izango ginela merkatuko liderrak. Baina itxi behar zuten enpresa horiek lanean jarraitzen dute, eta gu kalean gaude, zentimorik gabe gainera», zioen Abel Pereira Marmoles Urecheko delegatuak.
Jose Martin Etxeberria Adegi patronaleko presidente ohia eta haren anaia dira Urecheko jabeak. «Enpresaburu eredua zela, baina esandakoaren kontrakoa egin du», esan zuen Pereirak. Urritik soldatarik ez dute kobratu langileek. Kaleratzeengatik jaso beharreko kalte-ordaina negoziatzen ere aritu dira azken asteotan, baina ez dute legeak dioena baino gehiago jasotzerik lortu.
