Txinan ez ezik Italian ere jaitsidira esportazioak, %1,6 hain zuzen. Insat Italiako Estatistika Institutuak atzo jakinarazi zuenez, jaitsiera hori izan da herrialdea atzeraldian sartzearen arrazoietako bat. Inbertsioen %1,9ko murrizketak ere izan du eraginik. Insatek atzo baieztatu zuen herrialdea dagoeneko sartu dela atzeraldian, bi hiruhilekotan jarraian ez baitu hazkunderik izan. Bigarren hiruhilekoan, %0,4 jaitsi zen Italiako Barne Produktu Gordina (BPG), eta, hirugarrengoan, %0,9. 1998tik herrialdea atzeraldian dagoen lehen aldia da.
Bien bitartean enpresek kaleratzeen berri ematen jarraitzen dute. Rio Tinto meatzaritza taldeak 14.000 lanpostu suntsituko dituela iragarri du, dituen langile guztien %13 hain zuzen. Horietako 5.500 langilek mugarik gabeko kontratuak zituzten, eta 8.500ek, aldi baterakoak.
Taldeak 38.900 milioi dolarreko zorra du, eta kaleratzeen bidez 5.000 milioi dolar ordaintzea aurreikusten du. Era berean, inbertsioak murriztuko dituela eta aurreikusi baino aktibo gehiago salduko dituela iragarri du enpresak. Ekimen horiei esker, 2009 amaierarako 10.000 milioi dolar gutxiagoko zorra izan nahi du. «Neurrien bidez akzioen balioari eutsi nahi zaio, dirua salbatzeko eta zorrak murrizteko», adierazi du Rio Tintok.
