Beste erreskate bat egin berri du Aita Mari ontziak Mediterraneoan. Oraingoan, 60 lagun aurkitu dituzte, egurrezko txalupa batean noraezean. Nazioarteko uretan zeuden, fronte baten ondorioz arratsaldean itsasoak txarrera egitea espero den leku batean. Orain, portu seguru bat edukitzeko zain daudela esan dute itsasontziko arduradunek. «Gogorarazi behar da Italian eta Maltan daudela gertu dauden eta seguruak diren portu bakarrak», nabarmendu dute. Nazioarteko legedia betez, Aita Mari-k ahalik eta distantzia txikienean nabigatzeko eskubidea duela erantsi dute.
24 orduan baino gutxiagoan egiten duten bigarren erreskatea da. Hain zuzen, atzo beste 93 pertsona salbatu zituzten. Ontziko arduradunek ziurtatu dute Mediterraneo itsasoa dela etorkinentzako mugarik okerrena.
