Arantza Aldezabal eta Joseba Azkarraga Sare plataformako kideek aurkeztu dute hasi den urte politikorako dinamika. Horren bidez, presoen %95i eta haien senideei eragiten dien "sakabanaketa mendekatzailea" salatu nahi dute, "estalitako bizi guztiko zigorra ezartzen dien salbuespen legeria" arbuiatzearekin batera.
Salatzen dut deitu diote kanpainari, baina salaketa hutsa baino gehiago izatea nahi du Sarek: "Bat egite eta herritarren aktibazio tresna izan dadila. Borroka demokratikoaren ikur". Herritarrek kanpaina beren egitea da plataformaren asmoa: "Herritar bakoitzak bere egin dezala, eta ager dadila Anoeta, San Mames, Mendizorrotza, Ipurua edo Sadarreko harmailetan. Baskoniaren kantxan, Miribillan edo Donostian. Musika jaialdietan, lantegietan, unibertsitateetan, erietxeetan eta kaleetan".
Gaixo dauden presoen egoerari erreparatu diote, eta gogorarazi dute libre behar luketen zazpi presok espetxean jarraitzen dutela, ez dizkietelako zigorrak batu. Zigorrak batzeko auzian presoen eskubideak urratu direla adierazi zuten txosten batean hainbat juristak, eta agiri hori Europako Batasuneko erakundeetara eramango du Sarek.
Horrez gain, mobilizaziora deitu dute: Donostian egingo dute martxa bat urriaren 15ean, Gaixo larriak etxera lelopean.
