Fiskaltzak eskatutako lekukoen deklarazioekin zen jarraitzekoa Auzitegi Nazionalean ezker abertzaleko 35 kideren aurkako epaiketa, baina ez da horrela izan. 10:00etan zen hastekoa saioa, baina ordu erdi luzez atzeratu da, bi aldeek lotutako akordioa lortuta.
Auzipetuek akusazioak onartu dituzte, aitortuz legeriaren aurka jardun zutela. Halaber, "indarkeriazko jarduera ororen" aurkako konpromisoa azaldu dute, eta espero dute aitortza horrek biktimen oinazearen "erreparaziorako" balio izatea.
Bestalde, AVTk eta Dignidad y Justiciak onartu dute aitortza horren ondorioz zigorrak murriztea; urte eta erdi eta bi urte bitarteko espetxe zigorrak ezarri dizkiete guztiei, eta, beraz, auzipetu bat ere ez da espetxera joango. Halaber, aitortu dute bost urtez luzatu dela auzia, auzipetuen borondatearen kontrara.
Akordioa banan-banan berretsi dute akusatuek epaileen aurrean, eta, behin hori eginda, frogei eta gainerako prozedurei uko egin diete bi aldeek. Iazko abenduaren 3an hasi zen epaiketa, Seguran 2007an eginiko polizia operaziotik zortzi urtera.
Helburua lortuta
Guztien izenean, Pernando Barrena Sortuko bozeramaileak hartu du hitza epaitegitik irtetean. Nabarmendu du inor espetxera ez joatea zela helburua, eta hori lortzeagatik pozik azaldu da. Halaber, espero du akordio horrek "balio izatea etorkizunean salbuespen legedien ezarpenarekin amaitzeko".
"53 preso politiko gehiago ez egotea lortu" delako pozik azaldu da ANV-EAEko Antton Gomez ere, baina azpimarratu du "salbuespen legeriak hor" jarraitzen duela eta ezin daitekeela esan lortutako akordioak egoera hori amaitutzat eman duela.
