Herri Kontuen Euskal Epaitegiak aurten argitaratutako txosten batean jakinarazi du AHT abiadura handiko trenaren lau kontratu esleipenetan irregulartasunak antzeman dituela.
Irregulartasun horiek 2009an eta 2010ean sinatutako kontratuetan ere bazeudela jakinarazi du Jose Ignacio Martinez aipatu epaitegiko presidenteak gaur, Eusko Legebiltzarreko Ingurumen Batzordean egindako agerraldia baliatuta.
Dena den, Herri Kontuen Euskal Epaitegiko presidenteak nabarmendu du akats horiek ez dutela kontratuen muina ezbaian jartzen. "Irregulartasunek interesa dute, baina ez dira nahikoak pentsarazteko beste kontratu bat egokiagoa litzatekeela kontu publikoetarako".
Irregulartasunen artean arlo ezberdinetakoak aipatu ditu Martinezek. Alde batetik, 2011ko kontratu guztietan epez kanpo aurkeztu zituzten Segurtasun eta Osasun Planak, eta arazo hori aurreko urteetan ere gertatu zela azaldu du.
Horrez gain, kontratua esleitzerakoan egindako balorazioetan "balio judizioen gehiegizko" garrantzia nabarmendu du Herri Kontuen Euskal Epaitegiak.
Gai horiek teknikarien irizpideen araberakoak direla azaldu arren —kontratuetan dauden irizpide subjektiboak, alegia— "balio judizio" horiek hobeto xehatuz gero horien kontrol hobea egin daitekeela gaineratu du.
ETS Euskal Trenbide Sareari irregulartasun horien berri eman dioten arren, urtez urte errepikatu dituela gogorarazi du Martinezek.
