24 eta 25 urteko bi mutil gazte atxilotu dituzte Gasteizen bikotekideei tratu txarrak ematea egotzita

Gasteizko Udaltzaingoak 24 eta 25 urteko bi mutil gazte atxlotu zituen atzo, bata zein bestea emakumeen kontrako indarkeria delitua leporatuta.

Udaltzaingoak agertu duenez, atzo goizeko bostak eta laurden aldera atxilotu zuten 25 urteko mutil gaztea,kalean, diskoteka baten inguruan. Iturri horren arabera, atxilotua eta haren bikotekidea diskotekan izan ziren Urteberria ospatzen baina une batean haserretu egin ziren. Neskak etxera alde egitea erabaki zuen, eta orduan, mutilak atzetik segi eta kalean joka hasi zitzaion. Kaleko jantziz zebiltzan bi udaltzainek erasoa ikusi zuten eta mutila atxilotuta eraman.

24 urteko mutila, berriz, gaueko hamaika eta erdiak aldera atxilotu zuten; udaltzaingoaren arabera, bikotekide ohiari etengabe mehatxuak egiten zizkion eta, halaber, iraindu egiten zuen telefono dei eta mezuen bidez.