Kutsatuen kurba koska bat beherago dago Hego Euskal Herrian, eta arinagoa da birusaren kutsatzearen larritasuna. Nafarroako Gobernuak eta Eusko Jaurlaritzak emandako informazioaren arabera, 287 COVID-19 kasu atzeman ziren atzo egindako probetan; 6.345 test egin zituzten, eta, hortaz, %4,5 izan zen positiboen portzentajea.
Herrialdez herrialde, kutsatu kopuruak Bizkaian baizik ez zuen gainditu ehun kasuren langa igandean: 125 kasu detektatu zituzten lurralde horretan. Gipuzkoan, 88 kasu zenbatu ziren; Nafarroan, 46, eta Araban, berriz, 25.
Nabarmen arintzen ari dena erietxeetako presioa da. Beheranzko joera agerikoa da maiatz hasieratik. Hegoaldean guztira hemezortzi lagun ospitaleratu zituzten igandean. Osasun agintariek jakinarazi dute guztira 403 paziente daudela ospitaleetan; gela arruntetan 262 daude, eta ZIUetan, berriz, 141 lagun daude COVID-19ak jota.
