Irailaren 30ean Herrira mugimenduaren aurkako operazioa egin zuen Guardia Zibilak, Espainiako Auzitegi Nazionalak hala aginduta. Hemezortzi lagun atxilotu zituzten, eta plataformak Hernanin, Iruñean, Gasteizen eta Bilbon dituen egoitzak itxi.
Lokarrik sinadura bilketa bat hasi zuen orduan, Mariano Rajoy Espainiako Gobernuko presidenteari, Jorge Fernandez Diaz Barne ministroari eta Eloy Velasco epaileari Herrira-rentzat askatasuna eskatuz.
3.000 sinadura baino gehiago bildu dituzte. "Espero dugu eskaera hori aintzat hartzea. Gobernuak bere ardura hartzen eta euskal gizarteari bake eta bizikidetzarako ahaleginetan laguntzen ari denaren keinu garrantzitsu bat izango litzateke", esan du Lokarrik.
