Azaroaren 23an hasiko da Espainiako Auzitegi Nazionalean ezker abertzaleko 35 militanteren aurkako epaiketa. Behin eta berriro gibelatu dute auzia —tartean, abokatuak atxilotuta—, baina Aurore Martin eta Haizpea Abrisketa auzipetuek gogoratu dutenez, zortzi urte pasatuak dira jada Espainiak haien aurkako prozedura abiatu zuenetik.
"Tartean bakearen aldeko iniziatiba indartsuak izan dira, eta jaso dugun elkartasuna azpimarratu nahi dugu". Horren adibide, gaur Baionan haiei babesa ematera bildu diren 22 kolektibotako kideak. Han ziren, erraterako, LDH giza eskubideen liga, Anai Artea; CFDT, LAB, ELB eta CGT sindikatuak; EELV, EH Bai, Parti de Gauche eta NPA alderdiak; baita mota anitzetako elkarteak ere.
Salatu dutenez, ezker abertzaleko militanteen "jarduera politikoa" epaitu nahi du Madrilek, hala nola mitinetan parte hartzea, prentsako artikuluak idaztea ala biltzarrak antolatzea: "Oinarrizko eskubide demokratikoen aurkako eraso bat da auzia". Abrisketa eta Martinek frantses naziotasuna dutela gogoratu dute, halaber, eta Frantziako Gobernuak Espainiari "sostengu aktiboa" ematen diola: "Madrilekiko duen morrontza aktiboa alde batera uzteko eskatzen diogu".
Elkarretaratzea, 13an
Auzia salatzeko protestara deitu dute 22 kolektiboen izenean. Azaroaren 13an eginen dute elkarretaratzea, Baionako herriko etxearen aitzinean, Errepresiorik ez, konponbideari bai lelopean. Bakearen aldeko ekinbideak indartzeko eskatu diete herritarrei bi auzipetuek: "Salaketaz gain, bakearen aldeko iniziatibak sortzeko baliatu behar dugu epaiketa. Eragozpenak aukera bilaka ditzagun".
