628 eragilek dute Kontseiluaren Bai Euskarari Ziurtagiria

Joxe Xabier Iñigok aurten lortu den kopuru altua azpimarratu,eta elkarte berri askok konpromiso prozesuan parte hartu izana goraipatu du."Aurreko urteetatik konpromisoak hartu eta aurten konpromiso horiek betetzen dituztela kreditatu duten enpresa eta elkarte kopurua oso altua izan da", adierazi du Iñigok.

Bestalde, Bai Euskarari Ziurtagiriak hiru maila nagusi dituela gogoratu du: Bidean; Guk Zerbitzua Euskaraz; eta Guk Zerbitzua eta Lana Euskaraz". Elkarte gehienak lehenbiziko mailan daudela aipatu du, erdiak baino gehiago, alegia; gutxi batzuk dira hirugarren mailan daudenak, %5 inguru; eta gainontzekoak, %15 inguru, bigarren mailan daude.

Kontseiluak dinamika hau bi esparrutan egiten dela azaldu du Iñigok. Herri eta eskualde mailari dagokionez, 17 herri edo eskualdetan esperientzia pilotoak eta ondorengo esperientziak abian jarrita daude, eta259 enpresa edo erakunde konpromisoak hartu dituzte eta betetzen ari dira. Beste maila herri mailatik gorakoa da, eragile nagusiena, alegia. Hor 369 enpresa edo erakunde daudela azaldu du Iñigok.

Dendak, tabernak, kirol taldeak, aisialdi taldeak, kultur arlokoak edota ikastetxeak ari dira parte hartzen prozesu honetan eta"kasu batzutan badaude erakunde publikoak, batez ere jabetza publikoko enpresak direnak", gaineratu du Joxe Xabier Iñigok.

Bestalde, Bai Euskarari Akordioaren Jarraipen Batzordearen izenean, Rebeca Arraras Nafarroako Emakume Enpresari eta Zuzendarien Elkarteko ordezkariak euskararen normalizaziorako konpromisoak areagotu egin behar direla esandu, "gero eta eragile gehiagok hizkuntz normalizazioaren prozesuan parte har dezaten".

Bai Euskarari Akordioaren Jarraipen Batzordea osatzen duten erakundeak hauek dira: Lan Enpresen Nafarroako Elkartea (ANEL); Athletic Club; BBK; Diario de Noticias; EHNE; ELA, Etxe Erregionalen Federazioa; Euskal Ekonomilarien Elkargoa; Eusko Ganbarak; Nafarroako Emakume Enpresari eta Zuzendarien Elkartea; MCC; eta Kontseilua.